पृथ्वी राजमार्गको गलौँदी खण्ड मर्मतका लागि आज राति बन्द रहने

२६ असोज, २०८३

काठमाडौँ । पृथ्वी राजमार्गअन्तर्गत धादिङको गजुरी गाउँपालिका वडा नम्बर ५ मा रहेको गलौँदीमा आज राति सडक बन्द रहने भएको छ ।

जिल्ला प्रशासन कार्यालय धादिङले सूचना निकालेर सडक मर्मतका लागि राति ११ देखि भोलि बिहान ५ बजेसम्म सडक बन्द रहने जानकारी गराएको हो ।

त्रिशूली नदीको कटानका कारण भासिएको सडकमा यसअघि भित्तो काटेर सञ्चालनमा ल्याइएको थियो । त्यहाँ थप मर्मत गर्नुपर्ने भएकाले आज राति गाडी आवागमन पूर्णरूपमा बन्द गर्न लागेको प्रशासन कार्यालयको सूचनामा भनिएको छ ।

अहिले दशैँको समय पनि भएकोले पृथ्वी राजमार्गमा गाडीको चाप अत्यधिक छ । यो बेला पानी परिहालेमा हिलोमा गाडी फस्ने जोखिम उच्च रहेकोले अहिले नै मर्मत गर्न लागेको सडक विभागले जनाएको छ । याे खण्डमा झन्डै ७० मिटर सडकमा समस्या रहेको छ ।